هل جربت ان تبكي؟

اه هل جربت ان تبكي عندما تكون محتاجا لان تبكي ، اوعوا حد يعمل فيها بطل ويقول انه ما بتجيش له لحظات بيبقي محتاج يملأ زجاجات من الدموع .

تعرفوا ان البكاء بيخرج شحنة كبت وغضب وضجر وضيق وبيخليك بالك هادى ورايق جدا .

مجتمعنا يعتبر ان بكاء الرجل عيبا ، وانه حق مشروع مورث للمراة فقط لانها تجيده فى سرعة فائقة وغريبة ولهذا لا يكون غريبا عليها اما الرجل عندما يبكى فتثار نظرات الاستهجان والاستنكار ازاى الرجل يبكي " ده راجل " ، ماهو علشان راجل مكتمل الرجولة لازم يبقي عنده احساس ومشاعر ويبكى والا سيكون صنما لا يحس ولا يشعر .

بيقولوا دمعة الرجل عزيزة جدا ، مش بتيجي لك لحظات بتحس انك عايز تقعد لوحدك مع نفسك فى الظلام وتبكي دون ان يراك احد وبتصعب عليك نفسك قوى وتحس انك مخنوق ومحتاج الخنقة دى تروح بشوية ميه نظيفة خارجة من حدقة العين .

كل ما تكون مخنوق بجد اقعد مع نفسك وهيئ الجو تماما للبكاء وجمع كل المواقف اللى اتظلمت فيها وافتكرها وجمع كل المواقف اللى الناس غلطت فيك فيها وافتكرها وابكى بدون صوت لا سيما بعض الاصوات التى ستخرج من انفك بفعل الدموع المنهمرة ثم ........

ستكتشف بعد البكاء انك كنت انسان عبيط لما تسيب اي حاجة تضايقك لانك بعد ان تخرج شحنة الدموع تلك سينقلب معك المود الى ضحك وتفاؤل ، ما هو خلاص شحنة النكد خرجت ونقلبها ضحك وهيستريا .

عايز اقول لكم كلمة : ابكوا كي تضحكوا