انا والدايت
منذ مطلع هذا الاسبوع اتخذت قرارا صعبا من اهم قرارات حياتى الا وهو انى اعمل " دايت " او ريجيم واستقيت كلمة " دايت " هذه من زميلتى الفاضلة زينب المهم قررت ان اعمل " دايت " زى زينب ونظرا لتردى حالتى " الكرشية " جدا ونظرا لوجود هذا المخلوق الذي يمشي امامي فى كل مكان ويجثم فوق انفاسي عند النوم قررت انى اعمل " دايت " وبما انى من سكان الادوار العليا فطلوع السلم عندى هو مارثون شاق جدا ، ولذا قررت انى اكون فتى رشيق ممشوق القوام ، وشرعت فورا فى الدايت .
قعدت افكر طب الدايت ده بيعملوه ازاى فيه واحد صاحبي ظريف قاللى خلى عربية نقل تعدى فوق كرشك والاخر قالى تجرى كل يوم 30 كيلو بس اكتشفت انى هابقي ديد مش دايت .
المهم ابتديت فى الدايت ولا احد يصدق اننى اريد ذلك بالفعل وقلت ياض يا سلم افطر فطار ذوات واتغذى غدا مساكين واوعى تتعشي .
وابتديت فعلا وفطرت فى اول يوم بيضة مسلوقة وربع رغيف والغدا كان قطعة توست سن بتاع المستشفيات ولما روحت بالليل وطبعا كنت منهار اتعشيت كوب من الزبادى البيتى ونمت وانا اتألم تاركا خلفي حلة محشي فلفل كما هي ولكن اثبت يا سلم خليك بطل .
ونمت وفى الفجر صحيت هاموت وقعدت زى الفار اقرقض فى خيار وجزر لغاية ما شبعت .
تانى يوم فطرت بيضة برضه وشوية سلاطة خضراء واتغديت توست برضه وعلى الرغم من مغريات الزملاء بالاكل الممتع الا اننى صامد صمود الابطال ويا جبل ما يهزك ريح عذرا " وياكرش ما يهزك ريح " .
المهم انى اصمد
اقولكم على حاجة
انا عارف نفسي هارجع فى كلامى بس اهو بجرب ويارب انفع وابقي رشيق ووسيم وحليوة واتخلص من رفيق دربي
اقولكم على حاجة
انا عارف نفسي هارجع فى كلامى بس اهو بجرب ويارب انفع وابقي رشيق ووسيم وحليوة واتخلص من رفيق دربي
" الكرش " .
