محتاجين اجازة يا عالم

كلنا محتاجين اجازة نتفسح فيها ونلعب ونمرح و"نصيع" بكل ما تحمله الكلمة من معانى يعنى خروج عن الحدود والمألوف وكل شئ ، وودت ان اكتب عن هذا لما وجدت نفسي محتاج الى اجازة انسي فيها كل شئ وأى شئ واشفي من "داء الاديتور" وهو مصطلح متعارف عليه في مكان عملى من كثرة العمل وأحاول النجاة من هذا المرض الفتاك الذي وللاسف اصاب بعض الزملاء وأصبح يحتاج الى معجزة للشفاء منه .

نفسي في اجازة كبيرة واروح على البحر وابلبط في الميه زى العيال ، واكل درة مشوي وتين شوكي على الكورنيش ، واحلى بأيس كريم " ياساتر عليا حتى فى الأجازة بفكر في الأكل برضه " ـ المـهم كلـما سمعت ان احدا من زملائي سافر يصيف ازددت حنقة وغيظا " اشمعنى انا " وارجع اقول لنفسي ياواد روح البلد يومين أو يوم ونص بعد الشغل زقطط نفسك واقعد على الترعة شوية واهو الناموس هايسليك ويحسسك انك متفاعل مع الاخرين ، واسمك أتفسحت .

نفسي في اجازة قد أسبوعين ثلاثة أربعة " بس يارب المدير بتاعى مايسمعنيش أحسن يشنقنى على باب حجرتى " ، من اسبوع كده رحت زفاف شقيق احدى زميلاتى العزيزات وكنت فرحان جدا ومش مصدق قلت يا واد أخيرا شفت الناس .

واتمنى ان تصفو احلامى بالاجازة على خروجة لحد مؤمن او حتى عصير عند فرغلى او حتى اكلة كشري من عند احسن مطعم فى التاريخ "المطعم الايطالى" ، يا سلام حلم الاجازة يراودنى بشراسة وبعتبر ان البوست ده هو طلب اجازة عاجل قبل ما داء الاديتور يفترسنى اكتر من كده ، وربنا هو الشافي .