احنا غلابة

ايوه احنا غلابة وغلابة جدا ، كل واحد فينا ماشي في نفس الطريق ومش بيغيره كل يوم نفس الطريق رايح الشغل جاى من الشغل مروح البيت راكب الميكروباص ويادوب يروح بيته علشان يلحق ينام شوية علشان تانى يوم رايح برضه الشغل علشان يشوف نفس الناس ونفس العمل الروتينى ونفس الحديث ونفس الوجوه الواجمة أو الباسمة كل على حسب حالته .

كأنه سيناريو لا يريد ان يتغير ابدا تدلف الى العمل وتضع بصمتك الكريمة لتثبت لرؤسائك انك لازلت حيا ومتواجدا فى المكان ولن تغادره الا ببصمة ايضا .

تدخل مكتبك فى نفس الحركة كل يوم كل يوم وتلاقي نفسك بتعمل نفس الشغل اللى كنت بتعمله امبارح لدرجة انك بتحس انك انسان آلى متبرمج على هذا ، وتحس انك لو أخدت يوم اجازة علشان ترتاح برضه هاتفضل تحس بالذنب انك تغيبت عن العمل وكان الدنيا هاتتهد لو انت لم تذهب الى العمل .

بتسلم على نفس الناس فى نفس الحركة الدائرية طب ماانت لسة سايبهم من كام ساعة هى صورة .

تليفونات وعايزين نعمل كذا وكذا وحاضر ومشاجرات خفيفة وتفطر وتشرب كوب شاى وتقعد تشتغل وبرضه هي هي الحكاية بتاعة كل يوم .

قتلى قى العراق وصراع في فلسطين وخلاص الجثة نحست على أخبار المذابح فكأنها تسمع أخبار عادية جدا عن رغيف العيش ويمكن تطورات الصراع على رغيف العيش بقت أهم .

وولع فى أعصابك والحق وأجرى وهات وانشر وخد وفى الاخر كله محصل بعضه ، وتقعد مستنى يوم القبض الكبير علشان تاخد المظروف اللى اصلا فقد معناه لديك لانه سيدخل نفس الدائرة الروتينية معك .

طب والحل الحل مش عارفه بس اكيد فيه حل واكيد انتم لديكم حلول ويهمنى جدا انى اسمعها لانى عجزت عن ايجاد اى حل لتلك الدوامة اليومية .